ជនសង្ស័យ២នាក់ត្រូវបានកម្លាំងសមត្ថកិច្ចដេញចាប់បានយ៉ាងតន់ហន់ ក្នុងពេលដែលបមុ្រងចូលធ្វើសកម្មភាពកាច់សោ.កម៉ូតូនៅក្នុងផ្សារត្រពាំងឬស្សី
08-August-2016 | ដោយ មែន កំសត់
ខេត្តត្បូងឃ្មុំ ៖ជនសង្ស័យ២នាក់ រួមទាំងម៉ូតូធុនC125មួយគ្រឿង ស៊េរី២០១៥ ត្រូវបានកម្លាំងសមត្ថកិច្ចដេញចាប់បានយ៉ាងតន់ហន់ ក្នុងពេលដែលបមុ្រងចូលធ្វើសកម្មភាពកាច់សោ.កម៉ូតូនៅក្នុងផ្សារត្រពាំងឬស្សី ឃុំរកាពប្រាំ ស្រុកត្បូងឃ្មុំ ហេតុការណ៍នេះឡើង កាលវេលាម៉ោង០៧ និង៣៥នាទីព្រឹកថ្ងៃទី៨ សីហា ២០១៦ ហើយបាននាំទៅឆែកដល់ផ្ទះ ក៏រកឃើញវត្ថុតាងជាច្រើនទៀតសម្រាប់ធ្វើសកម្មភាព ព្រមទាំងថ្នាំបំពុលឆ្កែ ។
លោកវរសេនីយ៍ត្រីឡុង សារិន អធិការរងនគរបាលស្រុកត្បូងឃ្មុំទទួលផែនព្រហ្មទណ្ឌប្រាប់ឱ្យដឹងថា នៅព្រឹកថ្ងៃខាងលើ មានអ្នកផ្ញើកង់ម៉ូតូនៅផ្សារត្រពាំងឫស្សីបានឃើញមុខសញ្ញា២នាក់ ដំបូងជិះម៉ូតូម៉ាកវ៉េវ ដោយជិះមកគួរឱ្យសង្ស័យ ក្រោយមកទៀតស្រាប់តែឃើញជិះម៉ូតូម៉ាកC125 មកម្តងទៀត ដោយប្រុងនឹងចូលមកកាច់សោ.កម៉ូតូនៅផ្សារ ដែលពលរដ្ឋទុកប្រហែស ។
លោកវរសេនីយ៍ត្រី ឡុង សារិន អធិការរងនគរបាលស្រុកត្បូងឃ្មុំប្រាប់បន្តថា ស្របពេលដែលបានឃើញសភាពបែបនេះ ក៏ប្រញាប់រាយការណ៍បន្ទាន់មកនាយប៉ុស្តិ៍រដ្ឋបាលឃុំរកាពប្រាំ ហើយកម្លាំងបានមកដល់ដេញចាប់មុខសញ្ញាទាំង២នាក់ ដោយបានទុកម៉ូតូចោលប្រឹងរត់គេចបានប្រហែលជាង២០០ម៉ែត្រ ក៏ក្របួចជាប់ទាំង២នាក់ ១-ឈ្មោះញ៉េប ដា អាយុ៣១ឆ្នាំ ២-ឈ្មោះយ៉ុន ហេង អាយុ២២ឆ្នាំ គឺរស់នៅភូមិមុខភ្នំ ឃុំទួលស្នួល ស្រុកក្រូចឆ្មារ ខេត្តត្បូងឃ្មុំ ។
ដោយមានការអនុញ្ញាតពីលោកស្នងការនគរបាលខេត្ត ក៏បានសុំគោលការណ៍ពីលោកព្រះរាជអាជ្ញាអមសាលាដំបូង ខេត្តក៏បានទៅឆែកឆេរផ្ទះរបស់ឈ្មោះញ៉េប ដា ដោយរកឃើញប្រដាប់កាច់សោ.កម៉ូតូ ថ្នាំបំពុលឆ្កែគ្រឿងបន្លាស់ម៉ូតូជាច្រើនផងដែរ ។ ចំពោះមុខសមត្ថកិច្ច ជននេះមិនបានឆ្លើយសារភាពពីសកម្មភាព ដែលបានកើតឡើងនាពេលកន្លងមកនោះទេ គឺឆ្លើយថា ទើបតែលើកទី១ ទៅវិញ ។
កន្លងមក ប្រជាពលរដ្ឋបានឃើញមុខសញ្ញានេះមិនដែលរកស៊ីអ្វីនោះទេ តែម៉ូតូមានជិះសុទ្ធសឹងតែទំនើបៗ ដោយក្នុងមួយខែ ២ទៅ៣គ្រឿង ។ ម៉្យាងវិញទៀត នៅពេលណាដែលជនឈ្មោះដា ទៅដល់ទីណាប្រាកដជាមានបាត់ម៉ូតូ ម៉ូតូរបស់ពលរដ្ឋហើយ ។ ផ្អែកតាមភស្តុតាងជាច្រើនដែលរឹបអូសបាន ទោះបីជាជននេះមិនបានឆ្លើយសារភាពក្តីសមត្ថកិច្ចបានវាយតម្លៃថា មានម៉ូតូជាច្រើនគ្រឿង ត្រូវកាច់សោ.កម៉ូតូ បានជាច្រើនគ្រឿង និងបានយកទៅលក់ទៅកន្លែងលក់ម៉ូតូណាមួយ ៕
ចំនួនអ្នកទស្សនា
- ថ្ងៃនេះ2931
- ម្សិលមិញ11441
- សប្តាហ៍នេះ32761
- ខែនេះ147911
- ឆ្នាំនេះ147911
- សរុប20590367